കേരള നീം ജി

കേരള ഓട്ടോമൊബൈൽസ് ലിമിറ്റഡ് (KAL) സുസ്ഥിര മൊബിലിറ്റിയിലേക്ക് മാറുന്നതിൻ്റെ ഭാഗമായി പരിസ്ഥിതി സൗഹൃദ ഇലക്ട്രിക് ഓട്ടോറിക്ഷകൾ നിർമ്മിക്കുന്നു. 2.2 kW BLDC മോട്ടോറും ലിഥിയം-അയൺ ബാറ്ററിയും ഉപയോഗിച്ചാണ് കേരള നീം ജി എന്ന് വിളിക്കപ്പെടുന്ന ഈ മുൻനിര മോഡലിന് ഊർജ്ജം നൽകുന്നത്. ഈ വാഹനത്തിൽ ഒറ്റ ചാർജിൽ 100 കിലോമീറ്റർ വരെ യാത്ര ചെയ്യാൻ സാധിക്കും. പരമാവധി 45 km/h വേഗവും 3.45 മുതൽ 4 മണിക്കൂർ വരെ ഫുൾ ചാർജിംഗ് സമയവുമാണ് എടുക്കുന്നത്. ഒരു ഡ്രൈവറെയും മൂന്ന് യാത്രക്കാരെയും വഹിക്കാൻ ഇത് രൂപകൽപ്പന ചെയ്‌തിരിക്കുന്നു. മെച്ചപ്പെട്ട കാര്യക്ഷമതയ്‌ക്കായി നിലവിൽ കനം കുറഞ്ഞതും ദൃഢതയേറിയതും ആയ കോമ്പോസിറ്റ് ബോഡി കൊണ്ടാണ് ഈ വാഹനം നിർമിച്ചിട്ടുള്ളത്. മെറ്റൽ ബോഡി വകഭേദങ്ങളും വികസിപ്പിച്ചുകൊണ്ടിരിക്കുന്നു.

ഈ വാഹനം ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യ (എആർഎഐ) സാക്ഷ്യപ്പെടുത്തിയതും സുരക്ഷാ, പ്രകടന മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തുന്ന സെൻട്രൽ മോട്ടോർ വെഹിക്കിൾസ് റൂൾസ് (സിഎംവിആർ) പ്രകാരം അംഗീകരിക്കപ്പെട്ടതുമാണ്. ഇലക്ട്രിക് ഓട്ടോയുടെ പ്രവർത്തനച്ചെലവ് കിലോമീറ്ററിന് 0.50 രൂപ മാത്രമാണ്. ഇത് പൊതുഗതാഗതത്തിന് അനുയോജ്യമായതും ദീർഘകാല സുസ്ഥിരത ഉറപ്പാക്കുന്നതുമായ ഒരു പരിഹാരമാക്കി മാറ്റുന്നു. കെ എ എൽ ലോർഡ്സ് ഓട്ടോമേറ്റീവ് പ്രൈവറ്റ് ലിമിറ്റഡും സൺലിറ്റ് പവർ പ്രൈവറ്റ് ലിമിറ്റഡും പോലുള്ള സ്ഥാപനങ്ങളുമായി ചേർന്ന് കേരളത്തിന് പുറത്തേക്കും ഇലക്ട്രിക് മുച്ചക്ര വാഹനങ്ങൾ വിപുലീകരിക്കുകയും ഡീലർ നെറ്റ്‌വർക്ക് വികസിപ്പിക്കുകയും ചെയ്യുന്നു.

പരമ്പരാഗത വാഹനങ്ങളിൽ ഇ വി കിറ്റുകൾ സ്ഥാപിച്ച് അവയെ വൈദ്യുത വാഹനങ്ങളായി പുനഃക്രമീകരിക്കുന്നതിനും ഭാവി മോഡലുകൾക്കായി സോളാർ ചാർജിംഗ് സാങ്കേതികവിദ്യ വികസിപ്പിക്കുന്നതിനും കെഎഎൽ പ്രവർത്തിക്കുന്നു. സീറോ എമിഷൻ, കുറഞ്ഞ അറ്റകുറ്റപ്പണികൾ, ഉയർന്ന കാര്യക്ഷമത എന്നിവയോടെ, KAL ൻ്റെ ഇലക്ട്രിക് ഓട്ടോറിക്ഷ ഹരിത മൊബിലിറ്റി ദൗത്യത്തിനും നഗര ഗതാഗതത്തിലെ കാർബൺ ഉദ്വമനം കുറയ്ക്കുക എന്ന വിശാലമായ ലക്ഷ്യത്തിനും ഗണ്യമായ സംഭാവന നൽകുന്നു.